Joshua 19

A pakana gunan ba di tibe pire ra vuna tarai Simeon

1Ma di ga padapadailam pa ra vauruana tiniba ba kai Simeon, a ba kai ra vuna tarai Simeon varogop ma kadia lavur apik na tarai; ma kadia tiniba i ga tur livuan ta ra tiniba kai ra tarai Iuda. 2Ma kadia tiniba i dari: Ber-Seba, Seba, Molada, 3Kasar-Sual, Bala, Esem, 4Eltolad, Betul, Korma, 5Siklag, Bet-Markabot, Kasar-Susa, 6Bet-Lebaot, ma Saruken; a vinun ma a utul a pia na pal ma kadia lavur gunan ik; 7Ain, Rimon, Eter, ma Asan; a ivat na pia na pal ma kadia lavur gunan ik; 8ma ra lavur gunan dia tur kikil go ra lavur pia na pal tuk tar Balat-Ber, Rama ta ra papar Negeb. Go ia ra tiniba kai ra vuna tarai Simeon varogop ma kadia lavur apik na tarai. 9Ra tarai Simeon dia ga vatur vake ra tiniba ta ra langun kai ra tarai Iuda; tago ra pakana kai ra tarai Iuda i ga manga ngala ure diat, damana ra tarai Simeon dia ga vatur vake ta gunan livuan ta kadia tiniba.

A pakana gunan ba di tibe pire ra vuna tarai Sebulun

10Ma di ga padapadailam pa ra vautuluna tiniba ba kai ra tarai Sebulun varogop ma kadia lavur apik na tarai; ma ra langun ta kadia tiniba i tuk aro Sarid; 11ma kadia langun i ga vana urama ta ra matana taoai, ma i tuk tar Marala, ma i tadav Dabeset; ma i tuk tar ta ra tava alir ta ra luaina mata i Iokneam; 12ma i vana likun maro Sarid, ma i mur ra matana taur upi ra vanavana rikai kai ra keake, ma i tadav ra langun kai Kislot-Tabor, ma i vana uro Daberat, ma i tutua urama Iapia; 13ma papa aro i bolo upi ra papar a taur tuk tar Gat-Keper, tadav Et-Kasin, ma i vana rikai Rimon ma i vila likun uro Nea; 14ma ra langun i vana likun tana ta ra papar a labur tadav Kanaton; ma i tuk tar ta ra male Iptakel; 15ma Katat, Nalal, Simron, Idala, ma Bet-Lekem; a vinun ma a ura pia na pal ma kadia lavur gunan ik. 16Go ia ra tiniba kai ra tarai Sebulun varogop ma kadia lavur apik na tarai, a umana pia na pal ma kadia lavur gunan ik.

A pakana gunan ba di tibe pire ra vuna tarai Isakar

17Di ga padapadailam pa ra vaivatina tiniba ba kai Isakar, a tiniba kai ra tarai Isakar varogop ma kadia lavur apik na tarai. 18Ma kadia langun i ga tadav Iesrel, Kesulot, Sunem, 19Kaparaim, Sion, Anakarat, 20Rabit, Kision, Ebes, 21Remet, En-Ganim, En-Kada, Bet-Pases; 22ma ra langun i tuk tar Tabor, Sakasuma, ma Bet-Semes, ma ra Iordan ia ra mutuai kadia langun; a vinun ma laptikai na pia na pal ma kadia lavur gunan ik. 23Go ia ra tiniba kai ra vuna tarai Isakar varogop ma kadia lavur apik na tarai, a umana pia na pal ma kadia lavur gunan ik.

A pakana gunan ba di tibe pire ra vuna tarai Aser

24Ma di ga padapadailam pa ra vailimana tiniba ba kai ra vuna tarai Aser varogop ma kadia lavur apik na tarai. 25Ma kadia langun Kelkat, Kali, Beten, Aksap, 26Alamelek, Amad, ma Misal; ma i tadav Karmel ta ra matana taoai, ma Sikor-Libnat, 27ma i vana likun ma i mur ra vanavana rikai kai ra keake tuk tar Bet-Dagon, ma i tadav Sebulun ma ra male Iptakel ta ra papar a labur, Bet-Emek ma Neiel; ma i vana rikai pire Kabul ta ra papar a maira, 28Ebron, Rekob, Kamon, ma Kana, tuk tar Sidon ra ngala; 29ma ra langun i vana likun tadav Rama, ma tadav ra pia na pal Tiro nina di ga liplip bat ia; ma i vana likun mulai tadav Kosa, ma i tuk tar ta ra ta maravai ra langun Aksib; 30Uma bula, Apek, ma Rekob; a ura vinun ma a ura pia na pal ma kadia lavur gunan ik. 31Go ia ra tiniba kai ra vuna tarai Aser varogop ma kadia lavur apik na tarai, go ra umana pia na pal ma kadia lavur gunan ik.

A pakana gunan ba di tibe pire ra vuna tarai Naptali

32Di ga padapadailam pa ra valaptikaina tiniba ba kai ra tarai Naptali, kai ra tarai Naptali varogop ma kadia lavur apik na tarai. 33Ma kadia langun i ga tur pa ia aro Kelep ta ra iban i tur Sananim, ma Adami-Nekeb, ma Iabnel tuk tar Lakum; ma ra Iordan ia ra mutuaina; 34ma ra langun i vana likun ma i mur ra matana taoai pi na tadav Asnot-Tabor, ma i vana Kukok; ma i tadav Sebulun ta ra papar a taubar, ma i tadav Aser ta ra papar a taoai, ma Iuda ta ra Iordan ta ra vanavana rikai kai ra keake. 35Ma ra umana pia na pal nina di ga liplip bat diat, go diat: Sidim, Ser, Kamat, Rakat, Kineret, 36Adama, Rama, Kasor, 37Kedes, Edrei, En-Kasor, 38Iron, Migdal-El, Korem, Bet-Anat, ma Bet-Semes; a vinun ma lavuvat na pia na pal ma kadia lavur gunan ik. 39Go ia ra tiniba kai ra vuna tarai Naptali varogop ma kadia lavur apik na tarai, a umana pia na pal ma kadia lavur gunan ik.

A pakana gunan ba di tibe pire ra vuna tarai Isakar

40Di ga padapadailam pa ra valavuruana tiniba ba kai ra vuna tarai Dan varogop ma kadia lavur apik na tarai. 41Ma ra langun ta kadia tiniba i ga dari: Sora, Estaol, Ir-Semes, 42Salabin, Aialon, Itla, 43Elon, Timna, Ekron, 44Elteke, Gibeton, Balat, 45Ieud, Bene-Berak, Gat-Rimon, 46ma Me-Iarkon, ma Rakon, ma ra langun maravai Iopa.

47Ma ra langun kai ra tarai Dan i ga vana uro iat; tago ra tarai Dan dia ga vana urama ma dia ga varubu ma Lesem, ma dia ga uvia pa ia, ma dia ga ub ia ma ra mangi na pakat na vinarubu, ma dia ga vatur vake ma dia ga ki tana, ma dia ga vaiang tar ra iangina ba Dan, varogop ma ra iang i kadia ngala Dan. 48Go ia ra tiniba kai ra vuna tarai Dan varogop ma kadia lavur apik na tarai, go ra umana pia na pal ma kadia lavur gunan ik.

A pakana gunan ba di tibe pire Iosua

49Damana dia ga tibe vapar ra gunan ta kana lavur langlangun; ma ra tarai Israel dia ga tul tar ra tiniba tai Iosua natu i Nun livuan ta diat; 50varogop ma ra vartuluai kai ra Luluai dia ga tul tar nam ra pia na pal tana i ga lul upi ia: Timna-Sera ta ra gunan i lualuana Epraim; ma i ga pait ra pia na pal, ma i ga ki tana.

51Go ra umana tiniba, nina ba Eleasar ra tena tinabar, ma Iosua natu i Nun, ma ra umana lualua na apik na tarai ta ra umana vuna tarai Israel, dia ga tibe ma ra padapadailam aro Silo ta ra luaina mata i ra Luluai, ta ra mataniolo i ra pal na varbarat. Damana dia ga tibe vapar ra gunan.